काठमाडौँ । आइक्यानमा डिजिटल वालेटमार्फत पेमेन्ट गर्नका लागि एकमात्र विकल्पका रुपमा ईसेवा मात्र राखिँदा विद्यार्थीहरू मारमा परेका छन् । ईसेवामा पछिल्ला दिनहरूमा देखिएको समस्या कारण विद्यार्थीहरू मारमा परेका हुन् ।
अनलाइन गरिएको पेमेन्टमा समस्या देखिने, विद्यार्थीको पैसा काटिने तर आइक्यानको रेकर्डमा नदेखिने जस्ता समस्याले विद्यार्थीहरू आजित भएको देखिएको छ । ईसेवाबाट भुक्तानी गर्दा रकम कटौती भएर पनि सेवा नपठाउने, भुक्तानी नपुग्ने तथा प्रणालीमै समस्या आउने गरेको गुनासो स्वयम् आइक्यानका कर्मचारीले समेत गरेका छन् ।
यही कारण रिकन्सिलेसनमा पनि निकै समस्या रहेको आइक्यानका कर्मचारीहरू बताउँछन् । अर्कोतर्फ विद्यार्थीले आफूले चलाइरहेका अन्य वालेट प्रयोग गरि भुक्तानी गर्न पाउने अधिकारमा आइक्यानले कैँची चलाएको भन्दै दुखेसोसमेत गरेका छन् ।
आइक्यानको नियतमै शङ्का !
आइक्यानले विना कुनै प्रतिष्पर्धा ईसेवासँग व्यवसायिक सम्झौता गरेको छ । यतिसम्मकि आइक्यानले अन्य सेवा प्रदायकको तुलनामा महँगो सेवा ईसेवसँग लिइरहेको छ ।
यही बुझेर नै सिए सुजन कुमार काफ्ले अध्यक्ष हुँदा उनले अन्य सेवा प्रदायक पनि सिस्टममा जोड्न मौखिक निर्देशन दिएका थिए ।
तर, रिकन्सिलेसनमा हैरानी हुने बहाना बनाएर आइक्यानका कर्मचारीले सो निर्देशन अटेर गरे । ईसेवाका सिनियर कर्मचारीबाट प्रभावित भएर आइक्यानले अन्य सेवा प्रदायकलाई सिस्टममा नजोडेको भन्दै अहिले आइक्यानकै अन्य कर्मचारी यो विषयलाई लिएर अख्तियार जाने तयारीमा रहेको बुझिएको छ ।
प्रतिक्रिया दिनुहोस्