काठमाडौँ। नेपाल चार्टर्ड एकाउन्टेन्ट्स संघ (एक्यान) ले पूर्व बजेट छलफल गरेको छ। चैत २५ गते पहिलो दिन एक्यानले ‘आर्थिक वर्ष २०८३-८४ को बजेटको नेभिगेसन: वित्तीय यथार्थवादबाट स्रोत अनुकूलन र राष्ट्रिय सम्पत्ति सिर्जनासम्म’ पूर्व-बजेट छलफल सम्पन्न गरेको हो।
चैत २६ गते दोस्रो दिन पनि पूर्व बजेट छलफल हुने भएको छ। पहिलो दिनको छलफलमार्फत बैंकिङ, पूर्वाधार, आईटी, सरकार, आतिथ्य, लेखा परीक्षण फर्महरू र व्यापार क्षेत्रका पेशेवरहरूलाई अन्तर्दृष्टि र नीतिगत सिफारिसहरू साझा गर्न एकसाथ ल्याउने लक्ष्य राखेको छ।
काठमाडौंमा आयोजित उक्त कार्यक्रममा अर्थतन्त्रका विविध पक्षहरू, कर प्रणाली, राजस्व सुधार, निजी क्षेत्रको भूमिका तथा समग्र आर्थिक स्थायित्वका विषयमा गहन बहस भएको थियो।
कार्यक्रममा एक्यानका अध्यक्ष, पूर्वअध्यक्षहरू, चार्टर्ड एकाउन्टेन्टहरू, अर्थविद्हरू, व्यवसायी तथा सरकारी निकायका प्रतिनिधिहरूको सक्रिय सहभागिता रहेको थियो। सहभागीहरूले वर्तमान आर्थिक अवस्थाको समीक्षा गर्दै बजेटले समाधान गर्नुपर्ने प्रमुख चुनौतीहरू पहिचान गरेका थिए। विशेषगरी घट्दो आर्थिक वृद्धि, लगानीको न्यूनता, राजस्व संकलनमा देखिएको दबाब, र अनौपचारिक अर्थतन्त्रको विस्तारजस्ता विषयहरू छलफलको केन्द्रमा रहेका थिए।
एक्यानका अध्यक्षले मन्तव्यमा बजेटलाई यथार्थपरक, कार्यान्वयनयोग्य र दिगो विकासमुखी बनाउनुपर्नेमा जोड दिएका थिए। उनले कर नीतिमा स्थायित्व, पारदर्शिता र पूर्वानुमेयता आवश्यक रहेको उल्लेख गर्दै बारम्बार कर दर परिवर्तन गर्दा लगानीकर्तामा अन्योल सिर्जना हुने बताएका थिए।
साथै, डिजिटल अर्थतन्त्रलाई समेट्ने गरी कर संरचना परिमार्जन गर्नुपर्ने धारणा पनि राखिएको थियो।
आफ्ना अनुभव, विचार, विशेषज्ञता र सिफारिसहरू साझा गर्न समय निकाल्ने सबै सम्मानित पेशेवरहरूप्रति एक्यानले आभार व्यक्त गरेको छ। यस प्रकारका पूर्व-बजेट छलफलहरूले नीति निर्माण प्रक्रियामा सरोकारवालाहरूको सहभागिता बढाउने र व्यवहारिक तथा प्रभावकारी बजेट निर्माणमा योगदान पुर्याउने विश्वास व्यक्त गरिएको छ। छलफल कार्यक्रमका तस्विरहरू:
प्रतिक्रिया दिनुहोस्