काठमाडौँ । लेखा व्यवसायी सम्मेलनको पाचौँ संस्करण सुपर फ्लप भएको छ । अव्यवस्थित कार्यक्रम, प्रचार प्रसारको कमी, सिएहरुको कम चासो, र अपरिपक्व तयारीका कारण कार्यक्रम सुपर फ्लप भएको हो ।
काठमाडौँमा दुई दिन चलेको कार्यक्रममा अधिकांश सिएहरु हाजिरी गरेर टाप कसेका थिए । कार्यक्रम स्थलमा हाजिर गरेर कोही क्लाइण्टकोमा कोही आफ्नो जागिरमा हिँडेका थिए । तर पैसा तिरेर कार्यक्रममा हाजिरी गरेकै आधारमा उनीहरूले सीपीई क्रेडिट आवर भने पाउनेछन् ।
कार्यक्रममा सिएहरुको उपस्थिति निकै कम देखिन्थ्यो । यति सम्मकी अगाडिका दुई रो भन्दा पछि खासै सिएहरु थिएनन् । कार्यक्रम आरए सम्मेलन जस्तो देखिन्थ्यो । उपस्थितहरु पनि खासै कार्यक्रम तिर ध्यान नदिएर मोबाइल चलाईरेहका देखिन्थे ।
यसअघिका लेखा व्यवसायी सम्मेलनमा अर्थमन्त्री र गभर्नरको उपस्थिति हुने गरेको थियो । यसपटक कार्यक्रम नै विवादमा तानिएपछि अर्थमन्त्री र गभर्नर कार्यक्रममा आएनन् ।
कार्यक्रमको प्रचार प्रसारमा गरिएको कमजोरीका कारण मिडियाको उपस्थितिसमेत नगन्य देखिन्थ्यो । आइक्यानले प्रेस रिलिज गर्ने जिम्मेवारी एक विज्ञापन एजेन्सीलाई दिएको छ । उसले मिडियालाई पठाएको रिलिज बाहेक मिडियाहरू सो सम्मेलनमा उपस्थित भएको देखिएन ।
आइक्यानमा बिमल डंगोल कार्यकारी निर्देशक भएर आएपछि यो पहिलो सम्मेलन हो । उनको अपरिपक्वताका कारण कार्यक्रमको बिजोग देखिएको दाबी अधिकांशको छ । सिएहरुले भने पैसा नै तिर्नुपरेपछि सधैं सुनेका मान्छेहरूका सधैं उही कुरा सुन्न के जाने भनेर नगएको प्रतिक्रिया दिएका छन् ।
कतिपय सिएहरुले त यो कार्यक्रमलाई नीतिगत भ्रष्टाचारसमेत भनेका छन् । ‘पैसा तिरेर बासी भाषण सुन्न बोलाउने पनि कार्यक्रम हुन्छ ? यो त सिधै भ्रष्टाचार हो ।’ सिए कृष्णहरि बुढाथोकीले प्रतिक्रिया दिँदै भनेका छन्, ‘आइक्यानले यस्ता झुर कार्यक्रम गर्नु हुँदैन ।’
आइक्यानले आइक्यानमा उजुरी परेकाहरू कार्यरत संस्थाहरूबाट कार्यक्रम गर्न पैसा उठाएको थियो । सिएहरु खासै नआएपछि र आरएहरुले चासो नदिएपछि प्रायोजकहरूको पनि लगानी खेर गएको छ ।
प्रतिक्रिया दिनुहोस्