सिएको माग छ जनसक्ती छैन

नेपालमा बैंक, वित्तीय संस्था, सरकारी तथा गैरसरकारी संस्था आदिको बढ्दो
स्थापनासँगै चार्टर्ड एकाउन्टेन्सी (सिए) को माग बढेकाले पनि यो विषय
अध्ययन गर्नेको संख्या बढेको अधिकारी बताउँछन् । ‘अध्ययनपछि बेरोजगार बस्नु
नपर्ने भएकाले पनि सिए शिक्षाप्रति धेरैको आकर्षण बढेको हो,’ उनले भने ।
सिएमा पढाइसँगै अनिवार्य तालिमको समेत व्यवस्था छ । सिए शिक्षा लिएका
व्यक्ति जुुनसुकै क्षेत्रमा जान सक्ने भएकाले पनि धेरैको आकर्षण बढेको हो ।
दक्ष र अनुभवी चार्टर्ड एकाउन्टेन्टको माग कर्पोरेट क्षेत्र तथा
राष्ट्रिय–अन्तर्राष्ट्रियस्तरमा समेत बढिरहेको छ । आइक्यानका प्राविधिक
निर्देशक परमानन्द अधिकारी त सिएहरूको विशेषता अन्तर्राष्ट्रिय खालको हुने
बताउँछन् । हुन पनि नेपालमा सिए अध्ययन गरेकाहरू प्रतिष्ठित विदेशी
कम्पनीमा कार्यरत छन् । नेपालमा सिए अध्ययन गरेकाहरूले कतिपय देशमा
लेखापरीक्षण गर्न पाउँदैनन् तर लेखा व्यवस्थापनमा भने राम्रो अवसर भएको
अधिकारी बताउँछन् । आइक्यानले अन्तर्राष्ट्रिय वित्तीय प्रतिवेदन प्रणाली
(आइएफआरएस) लागू गर्न थालेको छ । विश्वव्यापी रूपमा एकै खालको लेखा प्रणाली
अपनाउने उद्देश्यले तयार गरिएको आइएफआरएस नेपालले पनि अपनाउन लागेको हो ।
यसमा ४० वटा लेखामान सूचक छन् । अबको लेखा प्रणाली यसै आधारमा तयार हुन्छ ।
यो अलि प्राविधिक खालको लेखामान भएकाले प्राविधिक यस्तो लेखा व्यवस्थापनका
लागि पनि जनशक्ति नै आवश्यकता पर्छ । अधिकारी भन्छन्, ‘नेपालमा पूर्ण
रूपमा आइएफआरएस लागू हँुदा यसले प्रशस्त सिएका लागि अवसर सिर्जना गर्छ
।’ नेपाल विश्वव्यापार संगठनको सदस्य भएकाले पनि नेपालको लेखा प्रणाली
विश्वले बुझ्ने खालको बनाउन आवश्यक छ । नेपालका कम्पनीहरूको लेखा
अन्तर्राष्ट्रिय कम्पनीले बुझ्न सके मात्र नेपालमा उनीहरूले सहकार्य गर्न
सक्ने सम्भावना रहन्छ । यो आइएफआरएसबाट मात्र सम्भव छ । यसका लागि सिए नै
चाहिन्छ । सिमा एकेडेमिक्सका निर्देशक युद्धराज ओली बजारको मागअनुसार सिए
नभएको बताउँछन् । ‘हाम्रो जस्तो भर्खर आर्थिक उन्नतितर्फ अग्रसर रहेको
देशमा दक्ष जनशक्तिको आवश्यकता प्रत्येक वर्ष बढ्दै जान्छ । अन्य
व्यावसायिक कोर्समा जस्तो सिएहरूको उत्पादन धेरै हुन सकेको छैन,’ ओली
भन्छन्, ‘हालको तथ्यांकअनुसार देशको आवश्यकताभन्दा धेरै गुणा कम मात्रामा
सिए उत्पादन भएका छन् ।’ हरेक व्यवसाय तथा संस्थामा सिएको खाँचो भए पनि
भविष्यमा यस पेसाप्रतिको आकर्षण र आवश्यकता थप बढ्दै जाने उनको भनाइ छ । स्रोत: नयाँ पत्रिका दैनिक