एनकासाको विज्ञप्ति- 'हामी ५ बर्ष पढ्दा पनि पास हुने ग्यारेन्टी छैन, सिए हुने सटकट बाटो मान्य हुँदैन'

• सिए सरोकार सम्बाददाता

काठमाडौँ । रजिस्टर्ड अडिटर प्रोफेसनल डेभलपमेन्ट टास्क फोर्सले आइक्यानलाई बुझाएको प्रतिवेदनमाथि नेपाल चार्टड एकाउन्टेन्ट्स विद्यार्थी संगठन (एनकासा)ले गम्भीर ध्यानकर्षण भएको बताएको छ । एक विज्ञप्ति जारी गर्दै एनकासाले यस्तो बताएको हो । टास्क फोर्सको प्रतिवेदनमा आफ्नो गम्भीर आपत्ति रहेको बताउंदै एनकासाले परिषद नै सिएको स्तर मा आंच आउने काममा लागेको भन्दै यसमा आफ्नो संगठनको गम्भीर आपत्ति रहेको बताएको छ ।

'सदस्यबर्ग, हजारौं विद्यार्थीहरु तथा संस्थाकै भविष्य जोडिएको यस्तो संवेदनशील विषयमा सरोकारवालाहरुसँग छलफल नगरी गरिने एकतर्फी निर्णय र गुपचुपमा अगाडी बढ्ने नीतिले संस्थाको भलो नहुने बुझाइ एनकासाको रहेको छ ।' एनकासाले विज्ञप्तिमा भनेको छ, 'अवको केहि समय पश्चात सिएहरुमात्र बजारमा रहने अवस्थामा सिएहरुको पेशागत बिकासका रणनीतिहरुमा बढी बिचार गर्नुपर्ने अवस्थामा परिषद नै सिएको स्तरमा आंच आउने निर्णय गर्न लागेको संवेदनशील अवस्थाप्रति एनका गम्भीर भएको छ ।'

पांच बर्षसम्म दुख तथा त्याग गरी मेहेनत गरेर पढ्ने विद्यार्थीसमेत सिए हुने ग्यारेन्टी नरहेको अवस्थामा कसैलाई एकेडेमिक म्याचीङगरी अथवा पेशागत अनुभवका आधारमा सिएको मान्यता दिनु गलत हो भन्ने कुरामा एनकासाले थप जोड दिएको छ । सिए हुन कसैलाई पनि कदापी सटकट बाटो उपलब्ध हुनु हुँदैन र सबैले समान बाटोबाट सिए हुनुपर्छ भन्ने कुरामासमेत एनकासाले आफ्नो धारणा स्पष्ट पारेको छ ।

विज्ञप्तिमार्फत एनकासाले आफुहरु आवश्यक परेको खण्डमा कुनै पनि कदम चाल्न पछी नहट्ने चेतावनीसमेत दिएको छ ।