चीसो मौसममा सिए विद्यार्थीहरुको सामाजिक काम : हातेमालो नेपाली विद्यार्थी समूहद्वारा न्यानो कपडा वितरण

• धुर्व प्रसाद देवकोटा / न्यू दिल्ली

भारतको राजधानी दिल्लीमा अध्ययनरत विद्यार्थीहरूको छाता सङ्गठन "हातेमालो नेपाली विद्यार्थी समूह (HNSG)" ले क्रिस्मसको अवसर पारेर मङ्गलबार गरिब तथा विपन्न वर्गहरुका लागि कपडा संकलन एवं वितरण कार्यकर्म सम्पन्न गरेको छ। 

"Giving is not just about making a donation. It is about making a difference" भन्ने मुल नाराका साथ लत्ताकपडा संकलनबाट सुरुवात गरिएको सो कार्यकर्ममा लक्ष्मीनगरमा रही सी. ए अध्ययन गरिरहेका विद्यार्थीहरुको साथै दिल्लीको अन्य विश्व विद्यालयमा अध्ययनरत् नेपाली विद्यार्थीहरुको उत्साहजनक सहभागिता थियो। विशेषत: नोवेम्बेर देखि फेब्रुअरी सम्म दिल्लीमा दिन प्रतिदिन बढिरहने जाडोले आर्थिक रुपमा असक्षम, मजदुर एवं विपन्न वर्गहरुलाई जाडो कटाउन निकै नै गाह्रो हुने र कठ्याँग्रिएर मृत्यु सम्मका भयावह परिस्थिति हुने गरेको छ। सोहि कुरालाई ध्यानमा राख्दै खुल्ला आकाश मुनि रात कटाउन बाध्य परिवारहरूलाई राहत होस् भन्ने उद्देश्यले यो कार्यक्रम आयोजना गरिएको सँगठनका सचिव रोशन कुमार यादवले जानकारी दिनुभयो।

कार्यक्रमका संयोजक आशिष कुमार बराल अनुसार विभिन्न विद्यार्थी एवं सहयोगी उदार मनबाट संकलन गरिएका ५२२ थान लत्ताकपडाहरुलाई हातेमालोका प्रतिनिधि साथीहरुले दिल्लीको कश्मिरी गेटको हनुमान मन्दिर परिसरमा ४१७ थान बाँडेका थिए भने १०५ थान लत्ताकपडाहरुलाई लक्ष्मीनगर वरपरका ठाँउहरूमा वितरण गरिएको थियो । उक्त लत्ताकपडा पाएका व्यक्तिहरुका मुहारमा धेरै पछि खुशीका टुस्साहरु पलाएको देखेर आगामी दिनहरूमा पनि यस्ता कार्यक्रमहरु गर्नका लागि आफुलाई प्रेरणा मिलेको उनको प्रतिक्रिया थियो। 

'सहानुभूतिमा मात्र सिमित नभई उदारता र मानवता देखाउनु मानवीय कर्तव्य हो” भन्ने मन्त्र नेपालीहरुले सदैव आत्मसात गर्दै आएको र त्यसको प्रत्यक्ष उदाहरण प्रवास मा रहेर पनि हाम्रो यस अभियानमा हातेमलो गर्दै सहयोग गर्न अगाडी लम्किनु भएको सम्पूर्ण प्रति हातेमालो परिवार कृतज्ञ रहेको संगठनका अध्यक्ष सरोज सुवेदीले बताउनुभयो। “हातेमालो नेपाली विद्यार्थी समूह” विद्यार्थीहरूको हकहितका कार्यक्रमहरूका साथसाथै अन्य समाजिक कार्यहरूमा पनि विगत लामो समय देखि निरन्तर रूपमा क्रियाशिल रहदै आएको छ।